سیف سٹیز نے جعلی اور فِشنگ ای چالان سیکڑوں ویب سائٹس بلاک کرا دیں

پنجاب سیف سٹیز اتھارٹی کی جعلی ای چالان ویب سائٹس کے خلاف بڑی کارروائی، 100 سے زائد فِشنگ سائٹس بلاک

پنجاب سیف سٹیز اتھارٹی (PSCA) کی جانب سے جعلی اور فِشنگ ای چالان ویب سائٹس کے خلاف بھرپور اور مسلسل کارروائیاں جاری ہیں۔ پاکستان ٹیلی کمیونیکیشن اتھارٹی (پی ٹی اے) کے تعاون سے ای چالان کے نام پر شہریوں سے فراڈ کرنے والی 100 سے زائد جعلی ویب سائٹس بلاک کروا دی گئی ہیں۔

بلاک کی گئی جعلی ویب سائٹس میں echallan-psca.top، pscae challan.com، echallanpunjab.com، pscae challan.vip سمیت متعدد مشکوک ڈومینز شامل ہیں، جو ای چالان کی آڑ میں شہریوں سے غیر قانونی آن لائن ادائیگیاں وصول کر رہی تھیں۔

سیف سٹی ترجمان کے مطابق یہ جعلی ویب سائٹس شہریوں کو گمراہ کر کے مالی فراڈ میں ملوث تھیں، لہٰذا شہریوں کو سختی سے ہدایت کی جاتی ہے کہ کسی بھی غیر مصدقہ یا مشکوک ویب سائٹ پر ای چالان کی ادائیگی ہرگز نہ کریں۔

ترجمان نے واضح کیا کہ ای چالان کی تصدیق اور ادائیگی کے لیے صرف پنجاب سیف سٹیز اتھارٹی کی آفیشل ویب سائٹ
👉 echallan.psca.gop.pk
یا پبلک سیفٹی ایپ استعمال کی جائے۔

انہوں نے مزید بتایا کہ سیف سٹی کے نام پر بنائی گئی جعلی ویب سائٹس کے خلاف قانونی اور تادیبی کارروائیاں مزید تیز کر دی گئی ہیں اور شہریوں کو دھوکہ دینے والے عناصر کے خلاف زیرو ٹالرنس پالیسی اپنائی جا رہی ہے۔