واٹس ایپ ہیکنگ فراڈ میں اضافہ، محکمہ داخلہ کی ہنگامی ایڈوائزری جاری

محکمہ داخلہ پنجاب نے صوبے بھر میں واٹس ایپ ہیکنگ اور نقالی (Impersonation) کے ذریعے کیے جانے والے مالی فراڈ کے بڑھتے ہوئے واقعات کے پیش نظر ایک ہنگامی ایڈوائزری جاری کر دی ہے۔ اس الرٹ میں تمام انتظامی محکموں، پولیس حکام اور فیلڈ فارمیشنز کو خبردار کیا گیا ہے کہ حالیہ دنوں میں حاضر سروس سرکاری افسران کے واٹس ایپ اکاؤنٹس ہیک ہونے کے کئی سنگین واقعات رپورٹ ہوئے ہیں۔
ایڈوائزری کے مطابق، سائبر مجرم سرکاری افسران کے اکاؤنٹس تک غیر قانونی رسائی حاصل کرنے کے بعد ان کے رابطوں (Contacts) کو ہنگامی مالی امداد کے جعلی پیغامات بھیجتے ہیں۔ ہیکرز افسران کے نام، عہدے اور عوامی سطح پر دستیاب تصاویر کا استعمال کرتے ہوئے ایک ایسی “ڈیجیٹل شناخت” بناتے ہیں جو دیکھنے میں بالکل اصل معلوم ہوتی ہے، جس سے لوگ دھوکہ کھا کر رقم منتقل کر دیتے ہیں۔
محکمہ داخلہ نے تمام سرکاری اداروں اور شہریوں کو مندرجہ ذیل ہدایات جاری کی ہیں:
تصدیق کے بغیر عمل نہ کریں: کسی بھی افسر یا دوست کی جانب سے موصول ہونے والے مالی مدد کے پیغام پر عمل کرنے سے پہلے اس کی بذریعہ کال تصدیق لازمی کریں۔
سکیورٹی اقدامات: اپنے واٹس ایپ پر ‘ٹو سٹیپ ویریفکیشن’ (Two-Step Verification) کو فوری فعال کریں۔
مشکوک لنکس سے گریز: کسی بھی غیر مصدقہ لنک پر کلک نہ کریں اور نہ ہی اپنا او ٹی پی (OTP) کسی کے ساتھ شیئر کریں۔
حکام نے ہدایت کی ہے کہ کسی بھی مشکوک سرگرمی کی صورت میں فوری طور پر متعلقہ سائبر کرائم حکام کو مطلع کیا جائے تاکہ مالی نقصان اور ڈیٹا کی چوری سے بچا جا سکے۔