موبائل سم خطرے میں؟ پی ٹی اے نے صارفین کو خبردار کر دیا

پاکستان ٹیلی کمیونیکیشن اتھارٹی (پی ٹی اے) نے موبائل فون صارفین کو خبردار کیا ہے کہ اگر کسی موبائل سم کو مسلسل 6 ماہ تک استعمال میں نہ لایا جائے تو متعلقہ ٹیلی کام آپریٹر کو اسے بند کرنے کا اختیار حاصل ہوگا۔

پی ٹی اے کے مطابق وہ سمز جن پر 180 دن تک کال، ایس ایم ایس یا انٹرنیٹ استعمال کا کوئی ریکارڈ موجود نہ ہو، انہیں غیر فعال تصور کیا جائے گا۔ ایسی سمز بند کیے جانے کے بعد یہ نمبر کسی دوسرے صارف کو دوبارہ جاری کیے جا سکتے ہیں۔

اتھارٹی نے واضح کیا ہے کہ ایک بار موبائل نمبر نئے صارف کے نام پر جاری ہو جانے کے بعد سابق صارف کا اس نمبر پر کسی قسم کا قانونی حق یا دعویٰ باقی نہیں رہتا۔

حکام کے مطابق اگر کوئی صارف کسی مجبوری یا وجہ کے باعث عارضی طور پر اپنی سم استعمال نہیں کر پا رہا تو وہ متعلقہ ٹیلی کام آپریٹر کو تحریری درخواست یا ای میل کے ذریعے مخصوص مدت کے لیے اپنا نمبر محفوظ رکھنے کی درخواست دے سکتا ہے۔