پی ٹی اے کا غیر فعال سمز سے منسلک واٹس ایپ اکاؤنٹس بند کرنے کا فیصلہ

اسلام آباد: پاکستان ٹیلی کمیونیکیشن اتھارٹی (پی ٹی اے) نے سائبر کرائمز اور مالیاتی فراڈ کی روک تھام کے لیے غیر فعال، منسوخ شدہ یا زیرِ استعمال نہ رہنے والی موبائل سمز سے منسلک تمام واٹس ایپ (WhatsApp) اکاؤنٹس کو بلاک کرنے کا حتمی فیصلہ کر لیا ہے۔

پی ٹی اے حکام کے مطابق نگرانی اور تحقیقات سے یہ بات سامنے آئی ہے کہ صارفین کی جانب سے سمز بند یا منسوخ کروا دینے کے بعد بھی انہی نمبروں پر رجسٹرڈ واٹس ایپ اکاؤنٹس کا استعمال جاری تھا، جنہیں معاشی فراڈ، جعلسازی اور دیگر غیر قانونی سرگرمیوں کے لیے استعمال کیا جا رہا تھا۔ ٹیلی کام ریگولیٹر کے مطابق ایسے اکاؤنٹس کے خلاف کسی بھی وقت بلاکنگ کی کارروائی شروع کی جا سکتی ہے۔

پی ٹی اے نے تمام موبائل صارفین کو ہدایت کی ہے کہ وہ اپنے واٹس ایپ اکاؤنٹس کو فوری طور پر اپنے نام پر درج فعال اور موجودہ موبائل نمبرز سے منتقل یا منسلک کریں۔ اتھارٹی نے تاکید کی ہے کہ نمبر تبدیل کرنے والے صارفین واٹس ایپ کی سیٹنگز میں جا کر ‘نمبر تبدیل کریں’ (Change Number) کا آپشن بلا تاخیر استعمال کریں تاکہ اپنے اکاؤنٹس کا کنٹرول اور ڈیٹا محفوظ رکھ سکیں، نیز اپنی سمز کی موجودہ حیثیت کی فوری تصدیق یقینی بنائیں۔