موبائل ٹاورز میں چوری اور توڑ پھوڑ کے واقعات، 16 فیصد سیلولر سائٹس متاثر

 پاکستان میں ٹیلی کام انفراسٹرکچر پر چوری اور توڑ پھوڑ کے واقعات میں تشویشناک اضافہ دیکھا گیا ہے، جہاں گزشتہ 11 ماہ کے دوران ملک بھر میں 9 ہزار 200 سے زائد چوری اور تخریب کاری کے واقعات ریکارڈ کیے گئے۔ پاکستان ٹیلی کمیونیکیشن اتھارٹی (PTA) کے مطابق ان چوریوں کے باعث ملک بھر کی مجموعی سیلولر سائٹس کا 16 فیصد حصہ براہ راست متاثر ہوا، جس سے نیٹ ورک اور انٹرنیٹ سروسز کی فراہمی میں شدید مشکلات پیش آئیں۔

صورتحال کا سنجیدہ نوٹس لیتے ہوئے پی ٹی اے نے تمام موبائل فون آپریٹرز کو ہدایت کی ہے کہ وہ ٹاورز پر ہونے والے ہر واقعے کی فوری ایف آئی آر درج کروائیں۔ اس کے ساتھ ہی قانون نافذ کرنے والے اداروں کو ہدایت کی گئی ہے کہ ان مقدمات کی منطقی انجام تک مؤثر پیروی یقینی بنائی جائے۔ اس مسئلے کے پائیدار قانونی و سیکیورٹی حل کے لیے وزارتِ قانون، پی ٹی اے اور وزارتِ آئی ٹی کے درمیان مشترکہ مشاورت کا سلسلہ جاری ہے، جبکہ ٹیلی کام کمپنیوں سے بھی اصلاحاتی تجاویز طلب کر لی گئی ہیں۔

علاوہ ازیں، ٹیلی کام سائٹس کو بجلی کی مسلسل فراہمی اور لوڈشیڈنگ سے بچانے کے لیے سیکرٹری وزارتِ آئی ٹی کی سربراہی میں ایک خصوصی کمیٹی قائم کر دی گئی ہے، جو ایکسپریس فیڈرز اور اسمارٹ ٹرانسفارمرز کے ذریعے بجلی کی فراہمی ممکن بنائے گی۔ پی ٹی اے نے بتایا کہ ٹیلی کام سائٹس کے لیے اسمارٹ گرڈ سسٹم پر کام شروع کر دیا گیا ہے، جبکہ نیپرا، پاور ڈویژن اور ڈسٹری بیوشن کمپنیوں (ڈسکوز) کے ساتھ ٹیلی کام سائٹس کو انڈسٹریل پاور ٹیرف فراہم کرنے کے لیے باضابطہ مذاکرات بھی جاری ہیں۔