بیرون ملک رہتے ہوئے پاکستانی سِم کیسے فعال رکھی جا سکتی ہے؟

اسلام آباد: پاکستان ٹیلی کمیونیکیشن اتھارٹی (پی ٹی اے) نے بیرونِ ملک مقیم پاکستانیوں کے لیے موبائل سم کے مستقل بلاک ہونے کے مسئلے سے بچاؤ کے لیے نیا نظام متعارف کروا دیا ہے۔

پی ٹی اے حکام کے مطابق اب اوورسیز پاکستانی طویل عرصے تک بیرونِ ملک قیام کے دوران بھی اپنی سم کی ملکیت برقرار رکھ سکیں گے، جسے وہ پاکستان میں اہلِ خانہ، بینکنگ، سرکاری اور دیگر ڈیجیٹل سروسز کے لیے استعمال کر سکیں گے۔

پی ٹی اے کے ترجمان نے بتایا کہ اس نئے نظام کے تحت پری پیڈ سم صارفین کو ہر 180 دن میں کم از کم ایک بار کسی سرگرمی میں حصہ لینا ہوگا جیسے کال کرنا، ایس ایم ایس بھیجنا، موبائل ڈیٹا استعمال کرنا یا بیلنس لوڈ کروانا۔ بصورت دیگر سم غیر فعال ہو سکتی ہے۔ پوسٹ پیڈ صارفین کو ہدایت کی گئی ہے کہ وہ اپنے بلز بروقت ادا کریں تاکہ سم کی سروس متاثر نہ ہو۔

اس اقدام پر بیرونِ ملک مقیم پاکستانیوں نے خوشی کا اظہار کیا۔ سعودی عرب میں مقیم شہری عرفان بھٹی نے کہا کہ گذشتہ آٹھ برس کے دوران دو مرتبہ سم بند ہو چکی ہے اور دوبارہ بحال کروانا مشکل تھا، یہ نظام واقعی سہولت ہے۔
متحدہ عرب امارات میں مقیم صبا حیدر نے کہا کہ سم بند ہونے کی وجہ سے بینک اور دیگر آن لائن سروسز متاثر ہو رہی تھیں، نئے نظام سے یہ مسئلہ حل ہوگا۔
سپین کے شہر بارسلونا میں مقیم محمد ندیم نے بھی کہا کہ بیرونِ ملک رہنے کے باوجود پاکستان سے رابطہ برقرار رکھنا ضروری ہے، اس نظام سے یہ ممکن ہو گا۔

پی ٹی اے حکام کا کہنا ہے کہ یہ اقدام ڈیجیٹل پاکستان کے وژن کے تحت اوورسیز پاکستانیوں کو ملک سے منسلک رکھنے کی سنجیدہ کوشش ہے۔