پی ٹی اے نے ٹیلی کام کمپنیوں کو موبائل پیکجز کی قیمتیں ماہانہ بنیادوں پر بڑھانے سے روک دیا

پاکستان ٹیلی کمیونیکیشن اتھارٹی (پی ٹی اے) نے صارفین کے مفاد میں بڑا فیصلہ کرتے ہوئے ٹیلی کام کمپنیوں کو موبائل پیکجز کی قیمتیں ماہانہ بنیادوں پر بڑھانے سے روک دیا ہے۔ پی ٹی اے نے “موبائل ٹیرف ریگولیشنز 2025” نافذ کر دیے ہیں، جس کے تحت اب موبائل پیکجز کی قیمتوں میں اضافہ صرف سہ ماہی (کوارٹرلی) بنیادوں پر کیا جا سکے گا۔ اس اقدام کا مقصد ملک میں ایک منظم اور متوازن ٹیرف نظام کو فروغ دینا ہے۔

حکام کے مطابق، اس سے قبل کمپنیاں ہر ماہ قیمتیں بڑھا رہی تھیں جس پر صارفین کی جانب سے شدید شکایات موصول ہو رہی تھیں۔ نئی پالیسی کے تحت کمپنیوں کو گزشتہ سال کی قیمتوں کو مدنظر رکھتے ہوئے صرف 10 سے 20 فیصد تک اضافے کی اجازت دی جائے گی، تاہم کسی بھی نئے پیکج کے اجراء یا موجودہ نرخوں میں تبدیلی کے لیے پی ٹی اے سے پیشگی منظوری لینا لازمی قرار دیا گیا ہے۔ پی ٹی اے کا کہنا ہے کہ پاکستان میں فی صارف اوسط ریونیو (ARPU) خطے میں سب سے کم ہے، تاہم حالیہ برسوں میں اس میں بہتری آئی ہے اور فائیو جی کی آمد کے بعد نیٹ ورک کی کارکردگی اور ریونیو میں مزید اضافے کی توقع ہے۔