پی ٹی اے کی ڈیجیٹل سکیورٹی بہتر بنانے کیلئے اہم ایڈوائزری جاری

اسلام آباد: پاکستان ٹیلی کمیونیکیشن اتھارٹی (پی ٹی اے) نے ملک میں بڑھتے ہوئے سائبر فراڈز کے تدارک اور شہریوں کی ڈیجیٹل سکیورٹی کو یقینی بنانے کے لیے ایک جامع ایڈوائزری جاری کی ہے۔ پی ٹی اے نے صارفین کو تاکید کی ہے کہ وہ اپنے آن لائن اکاؤنٹس کو محفوظ رکھنے کے لیے مضبوط اور منفرد پاس ورڈز استعمال کرنے کی عادت اپنائیں اور ایک سے زیادہ اکاؤنٹس کے لیے کبھی بھی ایک ہی پاس ورڈ استعمال نہ کریں۔ ترجمان کے مطابق، مختصر اور آسان پاس ورڈز سائبر خطرات میں اضافے کا باعث بنتے ہیں، اس لیے پاس ورڈ میں اپنا نام، تاریخِ پیدائش یا ‘1234’ جیسے آسان نمبرز استعمال کرنے سے مکمل اجتناب کیا جائے۔

اعلامیے میں شہریوں کو ہدایت کی گئی ہے کہ وہ اپنے اکاؤنٹس پر ‘دو مرحلہ جاتی تصدیق’ (Two-Factor Authentication) لازمی فعال کریں اور اپنے پاس ورڈز کو باقاعدگی سے تبدیل کرنے کے ساتھ ساتھ انہیں کسی بھی دوسرے شخص کے ساتھ شیئر نہ کریں۔ پی ٹی اے نے جدید ترین سکیورٹی فیچرز، جیسے فنگر پرنٹ یا چہرے کی شناخت (Biometric Features) کو روایتی پاس ورڈز پر ترجیح دینے کی سفارش کی ہے۔ اتھارٹی کا کہنا ہے کہ ایک مضبوط پاس ورڈ ہی محفوظ ڈیجیٹل مستقبل کی ضمانت ہے، لہٰذا شہری سائبر حملوں سے محفوظ رہنے کے لیے ان ہدایات پر سختی سے عمل کریں۔