فون کال کے ذریعے ڈیٹا ہیک کرنے کا پی ٹی اے کا انتباہی پیغام جعلی نکلا

اسلام آباد: پاکستان ٹیلی کمیونیکیشن اتھارٹی (پی ٹی اے) نے سوشل میڈیا پر فون نمبر ’051-7080507‘ کے حوالے سے گردش کرنے والے وارننگ پیغام کو مکمل طور پر جعلی، بے بنیاد اور گمراہ کن قرار دے دیا ہے۔

سوشل میڈیا اور میسجنگ ایپس پر وائرل ہونے والے ایک پیغام میں پی ٹی اے سے منسوب کر کے دعویٰ کیا جا رہا تھا کہ مذکورہ نمبر سے آنے والی کال موصول کرنے سے چند سیکنڈز کے اندر موبائل اکاؤنٹس، بینکنگ ڈیوائسز اور ذاتی معلومات چوری ہو سکتی ہیں۔ وائرل پوسٹ میں یہ بھی کہا گیا تھا کہ یہ نمبر ایک مخصوص ہیکنگ سافٹ ویئر سے منسلک ہے اور شہریوں سے اپیل کی گئی تھی کہ وہ سائبر فراڈ سے بچنے کے لیے یہ پیغام دیگر لوگوں تک پہنچائیں۔

پی ٹی اے نے باضابطہ وضاحت جاری کرتے ہوئے کہا کہ ادارے کی جانب سے ایسا کوئی انتباہ یا نوٹیفکیشن جاری نہیں کیا گیا اور وائرل پیغام کا اتھارٹی سے کوئی تعلق نہیں ہے۔ ٹیلی کام ریگولیٹر نے شہریوں کو ہدایت کی ہے کہ وہ سوشل میڈیا پر موصول ہونے والی غیر مصدقہ افواہوں پر کان نہ دھریں اور نہ ہی ایسے پیغامات کو آگے شیئر کریں۔ پی ٹی اے نے عوام پر زور دیا کہ سائبر سیکیورٹی اور ٹیلی کام سے متعلق کسی بھی تصدیق شدہ خبر کے لیے صرف پی ٹی اے کے سرکاری ویب سائٹ اور تصدیق شدہ سوشل میڈیا ہینڈلز سے رجوع کریں۔