موبائل سگنلز کی کمی سے پریشان صارفین کے لیے پی ٹی اے کی نئی تجویز

پاکستان ٹیلی کمیونیکیشن اتھارٹی (پی ٹی اے) نے موبائل نیٹ ورک کے کمزور سگنلز اور کالز میں دشواری کا سامنا کرنے والے صارفین کے لیے ’وائی فائی کالنگ‘ (Wi-Fi Calling) کے استعمال کی ہدایت جاری کر دی ہے۔ پی ٹی اے کے مطابق ایسے گھروں، دفاتر یا بالائی و زیرِ زمین مقامات جہاں موبائل سگنلز کی رسائی ممکن نہ ہو، وہاں روایتی سیلولر سگنلز کے بجائے کسی بھی فعال وائی فائی انٹرنیٹ کنکشن کی مدد سے باآسانی اعلیٰ معیار کی فون کالز کی جا سکتی ہیں۔ ترجمان نے واضح کیا کہ اس سہولت کے لیے موبائل ہینڈ سیٹ میں فیچر کی موجودگی اور متعلقہ ٹیلی کام آپریٹر کی جانب سے اس کی سپورٹ لازمی ہے، لہٰذا شہری اپنے فون کی سیٹنگز میں جا کر وائی فائی کالنگ کا اپشن آن کر کے اس متبادل سروس سے فائدہ اٹھائیں۔