فائیو جی اسپیکٹرم کی نیلامی 10 مارچ کو کرانے کا اعلان

پی ٹی اے نے ملک میں فائیو جی سروس کے آغاز کی جانب اہم پیش رفت کرتے ہوئے فائیو جی اسپیکٹرم کی نیلامی 10 مارچ کو کرانے کا اعلان کر دیا ہے۔

چیئرمین پی ٹی اے حفیظ الرحمان کا کہنا ہے کہ بہتر کنیکٹیویٹی کے بغیر ڈیجیٹل پاکستان کا خواب ادھورا ہے۔ انہوں نے امید ظاہر کی کہ فائیو جی آکشن کے بعد ملک میں انٹرنیٹ کے موجودہ مسائل میں نمایاں بہتری آئے گی۔

چیئرمین پی ٹی اے کے مطابق مارکیٹ میں 40 ہزار روپے تک کی قیمت میں بھی فائیو جی موبائل فون دستیاب ہیں، جبکہ مختلف کمپنیاں صارفین کو قسطوں پر موبائل فون فراہم کرنے کی سہولت بھی متعارف کرا رہی ہیں تاکہ زیادہ سے زیادہ افراد نئی ٹیکنالوجی سے فائدہ اٹھا سکیں۔

ڈائریکٹر جنرل لائسنسنگ عامر شہزاد نے بتایا کہ دنیا کے 101 ممالک فائیو جی سروس لانچ کر چکے ہیں اور پاکستان میں فائیو جی اسپیکٹرم کی نیلامی 10 مارچ کو ہو گی۔ ان کا کہنا تھا کہ دیہی علاقوں میں لوڈشیڈنگ کے باعث کنیکٹیویٹی متاثر ہوتی ہے، تاہم نئے اسپیکٹرم کی دستیابی سے سروس کے معیار میں بہتری آئے گی۔

حکام کے مطابق فائیو جی ٹیکنالوجی کے آغاز سے تیز رفتار انٹرنیٹ، بہتر آن لائن سروسز اور ڈیجیٹل معیشت کو فروغ ملنے کی توقع ہے۔