پاکستان سٹاک ایکسچینج میں مندی کا رجحان، 3000 پوائنٹس کی کمی

کراچی: مشرقِ وسطیٰ میں بڑھتی ہوئی کشیدگی اور علاقائی عدم استحکام کے باعث پاکستان سٹاک ایکسچینج (PSX) شدید مندی کی لپیٹ میں آگئی ہے۔ کاروباری ہفتے کے چوتھے روز ٹریڈنگ کے آغاز سے ہی فروخت کا شدید دباؤ دیکھا گیا، جس کے نتیجے میں کے ایس ای 100 انڈیکس میں 3000 سے زائد پوائنٹس کی بڑی گراوٹ ریکارڈ کی گئی۔

شدید مندی کے باعث ہنڈرڈ انڈیکس ایک لاکھ 51 ہزار 51 پوائنٹس کی سطح پر آ گیا ہے۔ واضح رہے کہ گزشتہ کاروباری روز مارکیٹ میں زبردست تیزی دیکھی گئی تھی اور انڈیکس ایک لاکھ 54 ہزار 292 پوائنٹس پر بند ہوا تھا، تاہم عالمی صورتحال نے سرمایہ کاروں کے اعتماد کو ٹھیس پہنچائی ہے۔

مشرقِ وسطیٰ کی صورتحال کے اثرات صرف پاکستان تک محدود نہیں بلکہ عالمی مالیاتی منڈیوں میں بھی گراوٹ دیکھی جا رہی ہے۔ ایشیائی مارکیٹوں میں جاپان کا نکی انڈیکس اور جنوبی کوریا کا کوسپی انڈیکس 3 فیصد تک گر گئے ہیں۔ اسی طرح ہانگ کانگ، تائیوان اور چین کی سٹاک مارکیٹس میں بھی نمایاں مندی ریکارڈ کی گئی ہے، جو عالمی سطح پر بڑھتے ہوئے معاشی خدشات کی عکاسی کرتی ہے۔