پی ایس ایل 12 آئندہ سال جنوری میں کرانے کی تجویز سامنے آگئی

پاکستان سپر لیگ (پی ایس ایل) کے 12ویں ایڈیشن کو آئندہ سال جنوری میں منعقد کرانے کی تجویز سامنے آئی ہے، جس کے لیے پاکستان کرکٹ بورڈ (پی سی بی) اور فرنچائز مالکان کے درمیان مشاورت جاری ہے۔ لندن میں منعقدہ پی ایس ایل گورننگ کونسل کے اجلاس میں مختلف تجاویز پر غور کیا گیا، جہاں جنوری میں ایونٹ کرانے کی صورت میں بین الاقوامی کھلاڑیوں کی عدم دستیابی کو ایک بڑا چیلنج قرار دیا گیا۔ اس کے ساتھ ہی پنجاب میں جنوری اور فروری کے شدید سرد موسم اور دھند کے باعث میچز کے بروقت اور کامیاب انعقاد پر بھی خدشات ظاہر کیے گئے ہیں۔ اجلاس میں ایوانِ کرکٹ کی مالی حالت کو مضبوط بنانے اور فرنچائزز سمیت براڈکاسٹرز کی آمدن میں اضافے کے لیے سال کے وسط میں ایک اضافی ٹورنامنٹ کرانے کی تجویز بھی زیرِ غور لائی گئی ہے