پاکستان کے ہر بچے کو جدید سہولیات فراہم کرنا ہمارا ٹارگٹ ہے، وفاقی وزیر آئی ٹی

وفاقی وزیر برائے انفارمیشن ٹیکنالوجی شیزا فاطمہ خواجہ نے لاہور ایکسپو سینٹر میں منعقدہ تقریب سے خطاب کرتے ہوئے کہا ہے کہ پاکستان کی آبادی تقریباً 24 کروڑ ہے، جن میں سے 15 کروڑ بچے اور بچیاں یوتھ ایج گروپ میں شامل ہیں، جو ملکی ترقی کا سب سے بڑا سرمایہ ہیں۔

انہوں نے بتایا کہ حکومت کی جانب سے اب تک 8 لاکھ خواتین کو ڈیجیٹل اسکلز کی تربیت دی جا چکی ہے، جبکہ اتنی ہی تعداد ڈیجیٹل والٹ سسٹم کا حصہ بن چکی ہے۔ حکومت پبلک اور پرائیویٹ سیکٹر کے اشتراک سے ملک میں ڈیجیٹل انقلاب لانے کے لیے پرعزم ہے۔

وفاقی وزیر نے کہا کہ حکومت تمام ضروری سہولیات فراہم کرے گی اور پاکستان کی برینڈنگ کا مقصد عالمی سطح پر پاکستان پر اعتماد بحال کرنا ہے۔ ہماری قومی معیشت تیزی سے ٹیکنالوجی ٹرانسفر کی جانب بڑھ رہی ہے اور نیشنل لیول فیڈریشن کی اونرشپ کو یقینی بنایا گیا ہے۔

شیزا فاطمہ کے مطابق ٹیکنالوجی کا اصل مقصد عام آدمی کی زندگی کو آسان بنانا ہے، جہاں پبلک سروسز ریڈ ٹیپ ازم اور کرپشن کے بغیر فراہم کی جا سکیں۔ پبلک پرائیویٹ پارٹنرشپ کے ذریعے بہتر اور مؤثر سروس ڈیلیوری کو یقینی بنایا جائے گا۔

انہوں نے مزید بتایا کہ گزشتہ دو برسوں میں 3 لاکھ بچوں کو تربیت دی گئی، جبکہ رواں سال ساڑھے سات لاکھ بچوں کو جدید ٹیکنالوجی کی ٹریننگ دینے کا ہدف مقرر کیا گیا ہے۔ اسکول، کالج اور یونیورسٹی سطح پر جدید ٹیکنالوجی سے لیس تعلیمی نظام متعارف کرایا جائے گا۔