مصر کے ساحلی شہر شرم الشیخ کے شمال مشرق میں 5.5 شدت کا زلزلہ

مصر کے مشہور ساحلی شہر شرم الشیخ کے شمال مشرق میں 5.5 شدت کا زلزلہ ریکارڈ کیا گیا ہے۔ مصر کے قومی ادارہ برائے فلکیات و ارضی طبیعات کے مطابق زلزلے کا مرکز زمین میں 10 کلومیٹر گہرائی میں تھا، جس کے جھٹکے مختلف علاقوں کے رہائشیوں نے واضح طور پر محسوس کیے۔ زلزلے کے فوراً بعد مصری وزیرِ صحت و آبادی خالد عبد الغفار نے قومی صحت ایمرجنسی پلان فعال کرتے ہوئے ملک بھر کے اسپتالوں کی ایمرجنسی اور آئی سی یو (ICU) شعبوں میں ہائی الرٹ جاری کر دیا ہے جبکہ ایمبولینس سروسز کو بھی الرٹ رکھا گیا ہے۔ مصری حکام اور ہلالِ احمر کی جانب سے تصدیق کی گئی ہے کہ اس زلزلے کے نتیجے میں کسی قسم کا جانی یا مالی نقصان نہیں ہوا اور ملک میں مجموعی صحت و امدادی صورتحال مکمل طور پر معمول کے مطابق ہے۔