پاکستان اور اسپین کا تعلیم، زراعت، کھیل اور انسانی ترقی میں تعاون بڑھانے پر اتفاق

وفاقی وزیر منصوبہ بندی احسن اقبال سے پاکستان میں اسپین کے سفیر کارلوس آراگون نے ملاقات کی، جس میں دونوں ممالک نے اعلیٰ تعلیم، زراعت، کھیل، ثقافت اور انسانی ترقی کے شعبوں میں تعاون کو مزید وسعت دینے پر اتفاق کیا۔ ملاقات میں نارووال یونیورسٹی اور اسپین کی یونیورسٹی آف گریناڈا کے درمیان مشترکہ تحقیق اور تعلیمی تبادلوں کے لیے مفاہمتی یادداشت (ایم او یو) کا مسودہ شیئر کیا گیا۔ احسن اقبال نے اسپین کو پاکستان میں زیتون کی کاشت، ایگری بزنس اور جدید زرعی ٹیکنالوجی میں تعاون کی دعوت دیتے ہوئے کہا کہ پوٹھوہار، بلوچستان اور ضم شدہ اضلاع میں زیتون کا فروغ پام آئل کی درآمد پر انحصار کم کرے گا۔ مزید برآں، وفاقی وزیر نے اسپین کی ملکہ کو ابتدائی بچپن کی نشوونما پر ہونے والی کانفرنس میں شرکت اور سفیر کو کرتارپور کے دورے کی دعوت دی۔ انہوں نے فیفا ورلڈ کپ کی فتح پر اسپین کو مبارکباد دیتے ہوئے پاکستان میں فٹبال کی کوچنگ اور تکنیکی معاونت کی بھی تجویز پیش کی۔ ہسپانوی سفیر نے پاکستان کی مہمان نوازی کو سراہا اور خطے میں امن کے لیے پاکستان کی سفارتی کوششوں کی تعریف کی۔