ایران کیلئے مذاکرات کا آخری موقع، آبنائے ہرمز جلد کھل جائے گی: ٹرمپ کا دعویٰ

امریکی صدر ڈونلڈ ٹرمپ نے میڈیا سے گفتگو کرتے ہوئے دعویٰ کیا ہے کہ تہران کی درخواست پر ایران کے ساتھ مذاکرات جاری ہیں اور ایران کے لیے یہ ایک “آخری موقع” ہے۔ واشنگٹن میں صحافیوں سے بات کرتے ہوئے صدر ٹرمپ نے کہا کہ دونوں ممالک کے درمیان معاملات مثبت انداز میں آگے بڑھ رہے ہیں اور جلد براہِ راست یا بالواسطہ بات چیت میں مزید پیش رفت ہوگی۔ انہوں نے اپنے اس موقف کا اعادہ کیا کہ امریکا ایران کو کسی صورت ایٹمی ہتھیار حاصل کرنے کی اجازت نہیں دے گا۔ ٹرمپ نے کہا کہ آبنائے ہرمز کل تک مکمل طور پر کھل جانی چاہیے جس کے بعد ایٹمی پروگرام پر باقاعدہ بات چیت کی جائے گی۔ برطانوی وزیراعظم اینڈی برنہم کے حوالہ سے گفتگو کرتے ہوئے ان کا کہنا تھا کہ وہ برطانیہ کے ساتھ اچھے تعلقات چاہتے ہیں اور برطانیہ کو سستی توانائی کے لیے شمالی سمندر میں موجود اپنے تیل کے ذخائر کا استعمال کرنا چاہیے۔ امریکی صدر نے دعویٰ کیا کہ ایران نے خود ان سے رابطہ کر کے حملہ نہ کرنے اور معاہدے کی درخواست کی تھی، تاہم ایران اس سے قبل بھی امریکی صدر کے ایسے دعوؤں کو مسلسل مسترد کرتا رہا ہے۔