واشنگٹن میں جنگل کی آگ بے قابو، 5 ہزار گھر خالی، 600 عمارتیں تباہ

امریکی ریاست واشنگٹن کے مشرقی علاقوں اور سپوکین شہر کے گرد و نواح میں جنگل کی آگ پر قابو نہیں پایا جا سکا، جس کے باعث خطرے کے پیشِ نظر تقریباً 5 ہزار گھروں کو خالی کرا لیا گیا ہے۔ عالمی میڈیا کی رپورٹس کے مطابق اس ہولناک آگ کے نتیجے میں اب تک 600 کے قریب مکانات، کاروباری مراکز اور دیگر عمارتیں تباہ ہو چکی ہیں اور آگ 21 مربع کلومیٹر رقبے پر پھیل چکی ہے۔ مغربی امریکا میں بھڑکنے والی ان درجنوں آگوں نے فائر فائٹرز اور ریلیف اداروں پر شدید دباؤ ڈال دیا ہے۔ دوسری جانب، مغربی اڈاہو اور مشرقی اوریگن کے گھاس زاروں میں لگی ایک اور بڑی آگ کو بجھانے کے لیے عملہ دسویں روز بھی بلڈوزروں اور ہیلی کاپٹروں کی مدد سے کارروائیوں میں مصروف ہے، تاہم یہ آگ پہلے ہی 1,360 مربع کلومیٹر کے وسیع رقبے کو اپنی لپیٹ میں لے چکی ہے۔