بالی ووڈ اپنی اصل شناخت سے دور ہوچکا، پرکاش راج

معروف اداکار اور بھارتی سیاستدان پرکاش راج نے بالی ووڈ پر کھل کر تنقید کی ہے اور کہا ہے کہ بھارتی سنیما اپنی اصل شناخت اور جڑوں سے دور ہو چکا ہے۔
بھارتی میڈیا کے مطابق پرکاش راج نے کیرالہ لٹریچر فیسٹیول کے دوران اظہار خیال کرتے ہوئے کہا کہ موجودہ دور میں بالی ووڈ میں سب کچھ پلاسٹک جیسا لگتا ہے، جبکہ ملیالم اور تامل فلم انڈسٹری اب بھی بامعنی اور اچھی کہانیاں پیش کر رہی ہیں۔
پرکاش راج نے بتایا کہ بالی ووڈ اب صرف ملٹی پلیکس اور پیسے پر مبنی فلمیں بنا رہا ہے، اور دیہی راجستھان اور بہار کے لوگوں سے اس کا تعلق ختم ہو گیا ہے۔
انہوں نے مزید کہا کہ جنوبی سنیما میں نوجوان ہدایت کار دلت مسائل پر بات کر رہے ہیں اور یہ بات فلم بینوں کے لیے امید کی علامت ہے۔
اداکار نے حال ہی میں ہندی فلم ’تیرے عشق میں‘ میں دھنوش کے والد کا کردار ادا کیا ہے اور وہ جلد سیاسی ایکشن ڈراما ’جنا نائگن‘ میں بھی نظر آئیں گے، جس کی ریلیز سینسر کے مسائل کے باعث مؤخر کر دی گئی ہے۔