درآمد شدہ موبائل فون پر ٹیکس میں فوری کمی کے امکان مسترد

ذرائع کے مطابق وزارت آئی ٹی اور پاکستان ٹیلی کمیونیکیشن اتھارٹی (پی ٹی اے) نے ملک میں فائیو جی ڈیوائسز کی کمی کو دور کرنے کے لیے درآمد شدہ موبائل فونز پر ٹیکس میں کمی کی سفارش کی تھی، تاہم فیڈرل بورڈ آف ریونیو (ایف بی آر) نے اس فوری کمی کے امکان کو مسترد کردیا۔

موبائل فون آپریٹرز فائیو جی سپیکٹرم کی نیلامی کے ساتھ موبائل فون ٹیکس میں کمی اور ٹیکس رعایت کا مطالبہ کر رہے تھے، لیکن وزارت آئی ٹی اور پی ٹی اے اس اہم مطالبے میں کامیاب نہیں ہو سکیں۔

ایف بی آر نے موقف اختیار کیا ہے کہ موبائل فون ٹیکس میں فوری کمی سے مجموعی ٹیکس وصولی کے اہداف متاثر ہوں گے، اور اس معاملے پر نظرثانی آئندہ بجٹ تک محدود رہے گی۔ وزارت خزانہ اور ایف بی آر کی مشترکہ کمیٹی اس سلسلے میں آئندہ بجٹ میں موبائل فون ٹیکس میں ممکنہ کمی کے امور کا جائزہ لے رہی ہے۔