پی ایم ڈی سی نے ایم ڈی کیٹ 2026 کے شیڈول کا اعلان کر دیا، امتحان 16 اگست کو ہوگا

اسلام آباد: میڈیکل اور ڈینٹل کالجز میں داخلے کے خواہشمند ملک بھر کے لاکھوں طلبہ کے لیے اہم ترین خبر سامنے آئی ہے۔ پاکستان میڈیکل اینڈ ڈینٹل کونسل (PM&DC) نے باقاعدہ طور پر ایم ڈی کیٹ (MDCAT) 2026 کے شیڈول کا پبلک نوٹس جاری کر دیا ہے۔ پی ایم اینڈ ڈی سی کے باضابطہ اعلامیے کے مطابق، امسال ایم ڈی کیٹ کا انعقاد 16 اگست 2026 بروز اتوار کو ملک بھر میں بیک وقت کیا جائے گا۔

کونسل نے طلبہ کی سہولت اور تیاری کے حوالے سے ایک اہم وضاحت کرتے ہوئے کہا ہے کہ ایم ڈی کیٹ 2026 کے لیے گزشتہ سال یعنی 2025 کا نصاب (Syllabus) ہی لاگو رہے گا، تاکہ طلبہ کو کسی نئی تبدیلی کی وجہ سے پریشانی کا سامنا نہ کرنا پڑے۔ پی ایم ڈی سی نے امتحان کے شفاف اور پُرامن انعقاد کے لیے تمام صوبوں اور متعلقہ ایڈمٹنگ یونیورسٹیز (Admitting Universities) کو باقاعدہ مراسلہ ارسال کر دیا ہے اور انتظامات کو حتمی شکل دینے کی ہدایات جاری کر دی ہیں۔ کونسل نے طلبہ کو تاکید کی ہے کہ وہ رجسٹریشن اور دیگر تازہ ترین تفصیلات کے لیے پی ایم ڈی سی کی آفیشل ویب سائٹ وزٹ کریں۔