پی ایم ڈی سی کا غیر مجاز کلینیکل پریکٹس غیر قانونی قرار

اسلام آباد: پاکستان میڈیکل اینڈ ڈینٹل کونسل (PMDC) نے ملک بھر میں اتائیت کے بڑھتے ہوئے رجحان کو روکنے کے لیے ایک بڑا قدم اٹھاتے ہوئے غیر مجاز کلینیکل پریکٹس کو سختی سے غیر قانونی قرار دے دیا ہے۔ پی ایم ڈی سی نے اس حوالے سے وزارتِ صحت کو ایک باقاعدہ خط ارسال کیا ہے جس میں فارماسسٹس، سائیکالوجسٹس اور ڈینٹل ٹیکنیشنز کی جانب سے کی جانے والی کلینیکل پریکٹس پر پابندی عائد کرنے کی سفارش کی گئی ہے۔ کونسل نے واضح کیا ہے کہ امراض کی تشخیص اور علاج صرف اور صرف رجسٹرڈ ڈاکٹرز اور ڈینٹسٹس کا قانونی اختیار ہے۔ صرف وہی ایلوپیتھک علاج فراہم کرنے کے مجاز ہیں۔ پی ایم ڈی سی کے مطابق الائیڈ ہیلتھ پروفیشنلز (جیسے فارماسسٹ اور ٹیکنیشنز) مریضوں کو ادویات تجویز نہیں کر سکتے۔ انہیں ہدایت کی گئی ہے کہ وہ فوری طور پر ایسی تمام غیر مجاز سرگرمیاں بند کر دیں۔کونسل نے خبردار کیا ہے کہ غیر مستند افراد کے ہاتھوں علاج اور اتائیت کی وجہ سے ایچ آئی وی (HIV) اور ہیپاٹائٹس جیسے خطرناک امراض پھیلنے کا شدید خدشہ ہے، جو انسانی جانوں کے لیے ایک سنگین خطرہ ہے۔

پاکستان میڈیکل اینڈ ڈینٹل کونسل نے اس بات پر زور دیا ہے کہ عوام کی زندگیوں کے تحفظ کے لیے صرف مستند طبی ماہرین سے ہی رجوع کیا جائے اور غیر قانونی کلینک چلانے والے عناصر کے خلاف سخت کارروائی عمل میں لائی جائے۔