پاک ترکیہ اقتصادی شراکت داری ایک نئے اور امید افزا دور میں داخل ہو رہی ہے، وزیراعظم

وزیراعظم پاکستان محمد شہباز شریف نے کہا ہے کہ پاکستان اور ترکیہ کے درمیان اقتصادی شراکت داری ایک نئے اور نہایت امید افزا دور میں داخل ہو رہی ہے، اور دونوں ممالک دوطرفہ تجارت کو 5 ارب امریکی ڈالر تک پہنچانے کے مشترکہ ہدف کو حاصل کرنے کے لیے پرعزم ہیں۔

سماجی رابطے کی ویب سائٹ ‘ایکس’ (سابقہ ٹوئٹر) پر جاری اپنے ایک بیان میں وزیراعظم شہباز شریف نے کہا کہ تاریخی شہر استنبول میں ترک صدر رجب طیب اردوان سے ملاقات میرے لیے انتہائی خوشی کا باعث بنی۔ اس ملاقات میں پاک ترکیہ سٹریٹجک شراکت داری کے تمام اہم اور تزویراتی پہلوؤں کا تفصیلی احاطہ کیا گیا۔

انہوں نے بتایا کہ ترک صدر کے ساتھ عالمی تنازعات کے حل اور بین الاقوامی امن و سلامتی کے تحفظ کے لیے تفصیلی مکالمہ ہوا، اور اس بات پر اتفاق کیا گیا کہ سفارت کاری اور باہمی احترام ہی پائیدار امن کا واحد راستہ ہے۔ وزیراعظم شہباز شریف نے صدر رجب طیب اردوان کی شاندار مہمان نوازی پر ان کا تہہ دل سے شکریہ ادا کیا۔

اپنے بیان میں وزیراعظم نے مزید کہا کہ پاکستان اور ترکیہ کے درمیان برادرانہ تعلقات کو مزید مضبوط اور بلند مقام تک لے جایا جائے گا۔ انہوں نے استنبول میں منعقدہ بزنس کانفرنس کا ذکر کرتے ہوئے کہا کہ وہاں انہیں ترکیہ کی متحرک کاروباری برادری کے ممتاز نمائندوں سے ملاقات اور دوطرفہ سرمایہ کاری پر تبادلہ خیال کا بہترین موقع بھی ملا۔