یوٹیوبر پیوڈی پائی نے بیٹے کی پرائویسی کی خاطر فیملی ولاگز ختم کرنے کا فیصلہ کر لیا

دنیا کے معروف ترین یوٹیوبر پیوڈی پائی (Felix Kjellberg) نے اپنے بیٹے کی بڑھتی ہوئی عمر اور پرائیویسی کے پیش نظر فیملی ولاگز بنانے کا سلسلہ مستقل طور پر ختم کرنے کا بڑا فیصلہ کر لیا ہے۔ سوشل میڈیا صارفین اور والدین کی جانب سے ان کے اس قدم کو بے حد سراہا جا رہا ہے۔

پیوڈی پائی نے اپنے اس فیصلے کی وجہ بیان کرتے ہوئے کہا کہ وہ چاہتے ہیں کہ ان کا بیٹا بیورن (Björn) جب بڑا ہو تو وہ خود اس بات کا فیصلہ کرے کہ آیا وہ اپنی زندگی کا کوئی حصہ انٹرنیٹ یا سوشل میڈیا پر لانا چاہتا ہے یا نہیں۔ ان کا کہنا تھا کہ جیسے جیسے بچہ بڑا ہو رہا ہے، اس کی نجی زندگی کا تحفظ ان کی اولین ترجیح بن گیا ہے، اس لیے وہ اب اپنے خاندانی اور نجی معاملات مزید پبلک نہیں کریں گے۔

واضح رہے کہ ڈیجیٹل میڈیا کے موجودہ دور میں جہاں بہت سے شوبز اور ڈیجیٹل کری ایٹرز اپنے بچوں کی زندگی کی ہر چھوٹی بڑی سرگرمی کو آن لائن کیمرے کی زد میں لے آتے ہیں، وہیں پیوڈی پائی کا یہ فیصلہ بچوں کے حقوق اور ڈیجیٹل پرائیویسی کے حوالے سے ایک انتہائی مثبت اور ذمہ دارانہ مثال قائم کرتا ہے۔ البتہ، انہوں نے واضح کیا ہے کہ وہ خود اپنے ذاتی چینل پر معمول کی ویڈیوز بنانا جاری رکھیں گے۔