پشاور ہائیکورٹ، کےپی حکومت کو سرکاری وسائل کے سیاسی استعمال سے روکنے کا حکم

پشاور ہائیکورٹ نے خیبرپختونخوا حکومت کی سرکاری مشینری، گاڑیوں اور عملے کے سیاسی استعمال کے خلاف اہم فیصلہ سناتے ہوئے واضح ہدایات جاری کر دی ہیں۔ عدالت نے حکم دیا ہے کہ کسی بھی احتجاج، مارچ یا سیاسی ریلی میں سرکاری گاڑی، مشینری یا عملہ استعمال نہیں ہوگا۔
عدالت نے اپنے فیصلے میں قرار دیا کہ سرکاری وسائل کا غیر مجاز استعمال بدعنوانی، اختیارات کے ناجائز استعمال اور بنیادی حقوق کی خلاف ورزی کے مترادف ہے۔ عدالت نے حکومت کو ہدایت کی کہ سیاسی سرگرمیوں میں مکمل غیر جانبداری یقینی بنائی جائے اور کسی سرکاری اہلکار کو سیاسی مقاصد کیلئے مقرر نہ کیا جائے۔
عدالت نے سرکاری اہلکاروں اور سرکاری مشینری کے سیاسی استعمال پر سخت تشویش کا اظہار کرتے ہوئے واضح کر دیا کہ سیاسی ریلیوں اور مارچ میں سرکاری وسائل کے استعمال پر مکمل پابندی عائد ہے۔
عدالتی فیصلے کے مطابق حکومت سرکاری وسائل کے قانونی اور مناسب استعمال کو یقینی بنائے، جبکہ سرکاری ملازمین سیاسی سرگرمیوں میں حصہ نہیں لے سکیں گے