پنجاب میں انسدادِ سموگ کارروائیاں تیز، 7 صنعتی یونٹس اور 4 بھٹے سیل

وزیراعلیٰ پنجاب مریم نواز شریف کی ہدایت پر صوبے بھر میں فضائی آلودگی کے خاتمے اور انسدادِ سموگ کارروائیاں مزید تیز کر دی گئی ہیں۔

سینئر صوبائی وزیر مریم اورنگزیب نے تفصیلات بتاتے ہوئے کہا کہ گزشتہ 24 گھنٹوں کے دوران 221 صنعتی یونٹس اور 354 اینٹوں کے بھٹوں کی انسپیکشن کی گئی۔ قوانین کی شدید خلاف ورزی پر 7 صنعتی یونٹس اور 4 بھٹے سیل جبکہ ایک صنعتی یونٹ اور ایک بھٹہ مسمار کر دیا گیا۔ محکمہ ماحولیات کی جانب سے صنعتی یونٹس پر 3 لاکھ 10 ہزار روپے اور بھٹوں پر 5 لاکھ روپے کے بھاری جرمانے عائد کیے گئے، جبکہ ایک بھٹے کے مالکان کے خلاف مقدمہ بھی درج کیا گیا۔

حکومت کے مطابق غیر معیاری پلاسٹک کے استعمال اور دیگر ماحولیاتی خلاف ورزیوں پر 169 مقامات کی چیکنگ کر کے 317 کلوگرام پلاسٹک ضبط کیا گیا۔ تجارتی کچنز اور باربی کیو پوائنٹس سے دھواں روکنے کے لیے 131 مقامات کی جانچ کی گئی جہاں 78 مقامات پر سکشن ہڈز کی تنصیب یقینی بنائی گئی۔ مریم اورنگزیب نے بتایا کہ ڈرون، نائٹ اور ہاک آئی فیلڈ سکواڈز کے ذریعے مسلسل نگرانی کی جا رہی ہے، جبکہ سموگ گنز اور پانی کے چھڑکاؤ کا عمل بھی جاری ہے۔

حکام کے مطابق 24 اکتوبر کو لاہور کا ایئر کوالٹی انڈیکس (AQI) 172 ریکارڈ کیا گیا جبکہ ہوا کی رفتار 6 کلومیٹر فی گھنٹہ رہی۔ سینئر صوبائی وزیر نے کسانوں اور عوام سے انسدادِ سموگ مہم میں مکمل تعاون کی اپیل کی ہے۔