پینٹاگون نے چین کے انتہائی خفیہ خلائی جہاز کی تصویر جاری کردی

پینٹاگون نے خلائی خطرات سے متعلق اپنی تازہ ترین رپورٹ میں چین کے انتہائی خفیہ اور بغیر پائلٹ کے چلنے والے خلائی جہاز ‘شین لونگ’ کی ہائی ریزولوشن تصویر جاری کر دی ہے۔ امریکی دفاعی انٹیلی جنس ایجنسی کی اس رپورٹ کے مطابق، پروں والے اس چینی خلائی جہاز کی ساخت امریکی اسپیس فورس کے X-37B سے شباہت رکھتی ہے اور اس میں سیٹلائٹ کی تنصیب کے لیے کارگو بے (Cargo Bay) کے دروازے بھی موجود ہیں۔ شین لونگ سال 2020 کے بعد سے اب تک 4 مداری مشن کامیابی سے مکمل کر چکا ہے۔ اگرچہ اس جہاز کے باقاعدہ ہتھیاروں سے لیس ہونے کے ثبوت نہیں ملے، تاہم رپورٹ میں چین کے لیزر ہتھیاروں کی تیاری اور روس کی جانب سے خلا میں جوہری سیٹلائٹ کی ممکنہ پیشرفت پر تشویش کا اظہار کیا گیا ہے۔