بڑی فتح: ’پسوری‘ یوٹیوب پر ایک ارب ویوز والا پہلا پاکستانی گانا بن گیا

لاہور: گلوکار علی سیٹھی اور شائے گل کے مقبولِ عام نغمے ‘پسوری’ نے تاریخی کامیابی حاصل کرتے ہوئے یوٹیوب پر ایک ارب (1 billion) ویوز کا سنگِ میل عبور کر لیا ہے، جس کے ساتھ ہی یہ اعزاز حاصل کرنے والی پہلی پاکستانی میوزک ویڈیو بن گئی ہے۔

کوک اسٹوڈیو سیزن 14 سے شہرت پانے والے اس گانے نے ریلیز کے بعد سے ہی عالمی سطح پر مقبولیت کے نئے ریکارڈ قائم کیے تھے اور متعدد بین الاقوامی میوزک چارٹس پر سرفہرست رہا۔ یوٹیوب پر ایک ارب ویوز کا ہندسہ عبور کرنے پر علی سیٹھی اور شائے گل نے ایک مشترکہ ویڈیو پیغام کے ذریعے دنیا بھر میں پھیلے اپنے تمام مداحوں کا شکریہ ادا کرتے ہوئے اس ناقابلِ یقین کامیابی پر مسرت کا اظہار کیا۔

موسیقی کے ماہرین اور تجزیہ کاروں کا کہنا ہے کہ ‘پسوری’ کی اس بے مثال کامیابی نے عالمی سطح پر پاکستانی میوزک انڈسٹری اور فنکاروں کی پذیرائی کے نئے راستے کھول دیے ہیں۔