اگست کے اختتام پر ایک شاندار فلکیاتی منظر کی پیشگوئی

اسلام آباد: رواں ماہ اگست کے اختتام پر فلکیاتی دنیا میں ایک نایاب اور دلکش منظر دیکھنے کو ملے گا، جب 27 اور 28 اگست 2026 کی درمیانی شب سال کا ایک اہم جزوی چاند گرہن (Partial Lunar Eclipse) واقع ہوگا۔

ماہرینِ فلکیات کے مطابق، اگرچہ یہ تکنیکی طور پر مکمل گرہن نہیں ہوگا، لیکن چاند کی سطح کا تقریباً 96 فیصد حصہ زمین کے گہرے سائے (Umbra) سے گزرے گا۔ اس دوران سورج کی روشنی زمین کے کرۂ ہوائی (Atmosphere) سے ریفریکٹ (Refract) ہو کر چاند پر پڑے گی، جس سے چاند کا بڑا حصہ سرخی مائل نارنجی رنگ اختیار کر لے گا اور آسمان پر ‘بلڈ مون’ (Blood Moon) جیسا خوبصورت منظر دکھائی دے گا۔

عالمی وقت (UTC) کے مطابق یہ جزوی چاند گرہن 28 اگست کو صبح 4 بج کر 13 منٹ پر اپنے عروج پر ہوگا۔ شمالی امریکا، جنوبی امریکا، یورپ اور افریقہ کے مختلف خطوں میں شہری اس منظر کا نظارہ کر سکیں گے۔ نیویارک اور ٹورنٹو میں یہ مقامی وقت کے مطابق 28 اگست کی رات 12:12 بجے، شکاگو میں 27 اگست کی رات 11:12 بجے، جبکہ لاس اینجلس میں رات 9:12 بجے اپنے نقطۂ عروج پر ہوگا۔

سائنسدانوں نے واضح کیا ہے کہ چاند گرہن کو عام آنکھ سے دیکھنا مکمل طور پر محفوظ ہے اور سورج گرہن کے برعکس اسے دیکھنے کے لیے کسی قسم کے حفاظتی فلٹرز یا خصوصی چشموں کی ضرورت نہیں ہوتی۔