فلسطینی بچے کے جواب نے جیکی چین کو غمزدہ کر دیا

ہالی ووڈ کے عالمی شہرت یافتہ اداکار جیکی چین نے غزہ میں اسرائیلی کارروائیوں کے باعث بچوں کو درپیش مشکلات پر گہرے دکھ اور افسوس کا اظہار کیا ہے۔

ایک تقریب سے خطاب کے دوران جیکی چین نے بتایا کہ انہوں نے حال ہی میں ایک فلسطینی بچے کی ویڈیو دیکھی، جس میں بچے سے سوال کیا گیا تھا کہ وہ بڑا ہو کر کیا بننا چاہتا ہے۔ اس پر بچے نے جواب دیا: “ہمارے علاقے کے بچے بڑے نہیں ہوتے۔”
اداکار کے مطابق یہ جملہ سنتے ہی ان کی آنکھوں سے آنسو نکل آئے۔

جیکی چین نے کہا کہ غزہ کے بچے روزانہ بمباری اور خوف میں زندگی گزار رہے ہیں، اور اس بچے کے چہرے پر موجود گہرا غم دل کو چیر دینے والا تھا۔ انہوں نے کہا کہ یہ مناظر کسی بھی حساس انسان کو اندر سے ہلا کر رکھ دیتے ہیں۔

تقریب میں موجود بزرگوں سے مخاطب ہوتے ہوئے جیکی چین نے کہا کہ بڑھاپا ایک نعمت اور خوش نصیبی کی علامت ہے، اس لیے وہ تمام بزرگوں کو مبارکباد دیتے ہیں جو اس عمر تک پہنچ سکے۔

واضح رہے کہ غزہ میں جاری اسرائیلی بمباری کے نتیجے میں عام شہریوں، بالخصوص بچوں اور خواتین، کو شدید انسانی بحران کا سامنا ہے۔ عالمی اور سوشل میڈیا پر روزانہ اموات اور تباہی کی تصاویر و ویڈیوز سامنے آ رہی ہیں جو دنیا بھر کے لوگوں کو غمزدہ کر رہی ہیں۔