اسرائیل کے حامیوں کو شکست، فلسطین ایکشن گروپ پر پابندی کا برطانوی فیصلہ غیرقانونی قرار

برطانوی گروپ فلسطین ایکشن نے دہشت گرد قرار دیے جانے کے خلاف ہائیکورٹ میں کیس جیت لیا۔پابندی 5 جولائی2025 کو اس وقت کی برطانوی وزیرداخلہ یوویٹ کوپر نے عائدکی تھی۔جس کے بعد ایکشن گروپ کی بانی رکن  ہدیٰ اموری نے ہائی کورٹ میں فیصلہ چیلنج کیاتھا۔اور بالآخرعدالت کی جانب سے فلسطین ایکشن گروپ پر  پابندی غیر قانونی قراردے دی گئی۔

برطانوی ہائی کورٹ نے اپنے فیصلے میں کہا کہ حکومت کی جانب سے احتجاجی تحریک فلسطین ایکشن گروپ کو دہشت گرد تنظیم قراردے کر کالعدم قرار دینے کا فیصلہ غیر قانونی تھا۔

سینیئر ججز نے فیصلہ سناتے ہوئے کہاکہ فلسطین ایکشن کی سرگرمیاں ایسی نہیں کہ اسے دہشت گرد قرار دیا جائے۔میڈیا رپورٹ کے مطابق ہائیکورٹ کے مزید آرڈر تک فلسطین ایکشن پر پابندی فی الحال برقرار رہے گی۔

فیصلے کے بعد عدالت کے باہر فلسطین ایکشن کے حامیوں نے جشن منایا اور فلسطین ایکشن اور فلسطین کے حق میں نعرے بازی کی۔جبکہ برطانوی وزیرداخلہ شبانہ محمود نے کہاکہ فیصلےسےمایوسی ہوئی،حکومت فیصلےکے خلاف اپیل کرے گی۔

واضح رہے کہ جولائی میں برطانوی حکومت نے فلسطین ایکشن نامی تنظیم کو اُن گروہوں کی فہرست میں شامل کیا تھا جن میں حماس اور حزب اللہ بھی شامل ہیں۔علاوہ ازیں فلسطین ایکشن کی رکنیت اختیار کرنا یا اس کی حمایت میں مظاہرہوں میں شامل ہونا سنگین فوجداری جرم قرار دیا تھا جس کی سزا 14 سال تک قید ہو سکتی تھی۔اس پابندی کے نتیجے میں تقریباً 3 ہزار افراد کو گرفتار کیا گیا تھا جن میں اکثریت ایسے افراد کی تھی جنھوں نے اس  تنظیم کے حق میں پلے کارڈز اٹھائے ہوئے تھے۔