گرمیوں کی تعطیلات ختم، کراچی سمیت سندھ بھر میں سکول اور کالج کھل گئے

کراچی سمیت سندھ بھر میں گرمیوں کی دو ماہ کی تعطیلات کا خاتمہ ہو گیا ہے، جس کے بعد تمام سرکاری و نجی سکول اور کالج دوبارہ کھل گئے ہیں اور تعلیمی اداروں میں تدریسی سرگرمیوں کا باقاعدہ آغاز کر دیا گیا ہے۔ محکمہ تعلیم سندھ کے پہلے سے طے شدہ نوٹیفکیشن کے مطابق یکم جون سے 31 جولائی تک جاری رہنے والی رخصت کے بعد تعلیمی ادارے یکم اگست سے دوبارہ کھول دیے گئے ہیں۔

محکمہ تعلیم کے فیصلے کے مطابق تعلیمی اداروں میں ہفتے کی تعطیل بھی ختم کر دی گئی ہے اور اب تمام سکول و کالجز ہفتے میں 6 دن کھلے رہیں گے۔ تعلیمی سال کے آغاز کے پہلے روز کچھ نجی اداروں نے تدریسی عمل 3 اگست سے شروع کرنے کا اعلان کیا، جس کی وجہ سے سکولوں میں طلبہ کی حاضری معمول سے کچھ کم دیکھی گئی، تاہم جن سکولوں میں کلاسز شروع ہوئیں وہاں اساتذہ نے بچوں کا پرجوش انداز میں استقبال کیا۔

تعلیمی ادارے کھلنے سے شہر بھر کے سکولوں میں دوبارہ رونقیں بحال ہو گئی ہیں اور صبح کے وقت سڑکوں پر ٹریفک کی نقل و حرکت بھی معمول پر آ گئی ہے۔ انتظامیہ نے والدین کو واٹس ایپ اور ای میل کے ذریعے نئے اوقاتِ کار اور ہفتہ وار شیڈول کے بارے میں آگاہ کر دیا ہے۔