ایران کا امریکی اسرائیلی حملے کی صورت میں بھرپور جواب دینے کا اعلان

ایران نے امریکا یا اسرائیل کی جانب سے کسی بھی ممکنہ فوجی کارروائی کی صورت میں جامع اور بھرپور جواب دینے کا سنگین انتباہ جاری کرتے ہوئے کہا ہے کہ ایرانی ردعمل صرف دفاع تک محدود نہیں رہے گا۔ تہران حکومت کے مطابق، اگر ان کی توانائی کی تنصیبات یا سرزمین کو نشانہ بنایا گیا تو جواب میں اسرائیلی تنصیبات اور خطے میں قائم امریکی بنیادی ڈھانچے سمیت تمام عسکری و اقتصادی مراکز کو ہدف بنایا جائے گا۔

ایرانی خاتم الانبیاء سینٹرل ہیڈ کوارٹرز کے اعلیٰ ترین کمانڈر میجر جنرل علی عبداللہی نے شدید ردعمل دیتے ہوئے کہا ہے کہ جارحیت کر کے باآسانی نکل جانے یا بھاگنے کا دور اب ختم ہو چکا ہے۔ ایرانی خبر رساں ایجنسی ‘تسنیم’ کے مطابق میجر جنرل عبداللہی نے دشمنوں کو خبردار کیا کہ کسی بھی غلط اندازے یا احمقانہ پیش قدمی کے نتائج انتہائی ہولناک اور پچھتاوے کا باعث ہوں گے۔

انہوں نے مزید کہا کہ امریکی افواج اور ان کے اتحادیاں پر اب یہ بات واضح ہو چکی ہے کہ خطے میں ان کی موجودگی کے ساتھ ان کے تابوت بھی ان کے فوجی سامان کا لازمی حصہ بن چکے ہیں۔ ایرانی کمانڈر کا کہنا تھا کہ مسلح افواج کے پاس منہ توڑ جواب دینے کی مکمل صلاحیت، پختہ ارادہ اور جامع منصوبہ بندی موجود ہے۔ یاد رہے کہ یہ بیان امریکی اخبار کی ان رپورٹس کے بعد سامنے آیا ہے جن میں دعویٰ کیا گیا تھا کہ صدر ٹرمپ نے ایران کی توانائی تنصیبات پر حتمی حملوں کے منصوبے کی ہدایت دی ہے۔