لاہور: لمز یونیورسٹی میں پاکستان کے سب سے بڑے سائنس اولمپیاڈ ’’سائنرجی‘‘ کی نمائش کا آغاز

لاہور: لمز یونیورسٹی میں پاکستان کے سب سے بڑے سائنس اولمپیاڈ ’’سائنرجی‘‘ کی نمائش کا باقاعدہ آغاز ہو گیا، جس میں ملک بھر سے 1200 سے زائد نوجوان طلبہ نے اپنے تخلیقی اور تحقیقی منصوبے پیش کیے۔

نمائش کا مقصد طلبہ کو سائنس، ٹیکنالوجی، انجینئرنگ اور ریسرچ کے عملی مواقع فراہم کرنا اور ان کی اختراعی صلاحیتوں کو اجاگر کرنا ہے۔ طلبہ نے روبوٹکس، مصنوعی ذہانت، ماحولیاتی مسائل کے حل اور انجینئرنگ سے متعلق جدید منصوبے نمائش میں پیش کیے۔

نمائش کے دوران صنعتی شعبے کے نمائندوں جن میں گوگریڈ، آکٹائلرن، ٹیکیفائی اور ڈیکسٹرز شامل ہیں، نے طلبہ کے پروجیکٹس کا جائزہ لیا اور ان کے ساتھ تبادلۂ خیال کیا۔ اس عمل کے ذریعے کئی منصوبوں کو عملی شکل دینے کے مواقع بھی سامنے آئے۔

منتظمین کے مطابق ’’سائنرجی‘‘ نے تعلیمی تحقیق کو صنعت سے جوڑنے اور طلبہ کے لیے مستقبل کے پیشہ ورانہ مواقع اجاگر کرنے میں اہم کردار ادا کیا ہے۔ انتظامیہ کا کہنا ہے کہ اس طرح کے پلیٹ فارمز پاکستان میں اسٹیم (STEM) تعلیم کے فروغ اور جدت کے جذبے کو مضبوط بنانے میں نہایت مؤثر ثابت ہوتے ہیں۔