کترینہ کیف پر نامناسب تبصرہ؛ سلمان خان کے آڑے ہاتھوں لینے پر آر جے نے معافی مانگ لی

بالی ووڈ اداکار سلمان خان کی شدید تنقید کے بعد کترینہ کیف کے وزن پر تبصرہ کرنے والے پاکستانی آر جے ڈاکٹر اعجاز وارث نے اداکارہ اور مداحوں سے معافی مانگ لی ہے۔ ڈاکٹر اعجاز وارث نے اپنے انسٹاگرام اکاؤنٹ پر ایک ویڈیو پیغام جاری کرتے ہوئے کہا کہ انہوں نے حال ہی میں ‘بگ باس 20’ کا قسط دیکھا جس میں سلمان خان کی گفتگو سننے کے بعد انہیں احساس ہوا کہ کترینہ کیف کے بارے میں ایسے الفاظ کا استعمال غلط تھا۔ انہوں نے وضاحت پیش کی کہ انہوں نے اپنی ویڈیو کو محض دلچسپ اور تفریحی بنانے کے لیے مذاق میں یہ باتیں کی تھیں، اور ان کا مقصد اداکارہ کو باڈی شیم (Body Shame) کرنا بالکل نہیں تھا۔

آر جے ڈاکٹر اعجاز وارث نے کترینہ کیف سمیت ان تمام افراد سے معذرت کی جن کی دل آزاری ہوئی، اور اعتراف کیا کہ ان کے الفاظ تکلیف دہ ہو سکتے ہیں جس پر وہ اپنے الفاظ واپس لیتے ہیں۔ واضح رہے کہ سلمان خان نے حال ہی میں ‘بگ باس 20’ کے شو کے دوران حمل (Pregnancy) کے بعد وزن بڑھنے پر خواتین کو سوشل میڈیا پر ٹرول کرنے والوں کو سخت تنقید کا نشانہ بنایا تھا۔ سلمان خان کا کہنا تھا کہ حمل کے دوران اور اس کے بعد وزن کا بڑھنا ایک قدرتی اور معمول کی بات ہے، اور کترینہ کیف جب دوبارہ فلموں میں کام شروع کریں گی تو وہ خود کو بالکل فٹ کر لیں گی۔