ٹیکساس میں پاکستانی آموں کی دھوم؛ ہیوسٹن مینگو فیسٹیول میں وفاقی وزیر احسن اقبال کی شرکت

امریکی ریاست ٹیکساس کے شہر ہیوسٹن میں شاندار “پاکستانی مینگو فیسٹیول” کا انعقاد کیا گیا، جس میں وفاقی وزیر برائے منصوبہ بندی و ترقی احسن اقبال نے خصوصی شرکت کی۔ اس رنگا رنگ میلے میں پاکستان سے آموں کے سب سے بڑے درآمد کنندہ (Importer) ذوالفقار مومن، ممتاز کمیونٹی لیڈر طاہر جاوید، پاکستانی قونصل جنرل اور امریکی کانگریس مین ال گرین (Al Green) سمیت پاکستانی نژاد امریکی برادری اور اہم شخصیات نے بڑی تعداد میں شرکت کی۔ فیسٹیول کے دوران شرکاء کو بتایا گیا کہ اس وقت پاکستان سے آموں کی 4 بہترین اور لذیذ اقسام امریکہ میں درآمد کی جا رہی ہیں جو مارکیٹ میں دستیاب ہیں۔ وفاقی وزیر احسن اقبال اور امریکی حکام نے پاکستانی آم کے ذائقے اور اس کی برآمدات کو بڑھانے کے لیے کی جانے والی کوششوں کو سراہا اور اسے دونوں ممالک کے تجارتی روابط کے لیے ایک بہترین سنگِ میل قرار دیا۔