پاکستانی شوبز شخصیات کی جانب سے مداحوں کو عیدالفطر کی مبارکباد

کراچی/لاہور: پاکستان بھر میں عید الفطر کے پرمسرت موقع پر شوبز انڈسٹری سے وابستہ شخصیات نے بھی بھرپور انداز میں خوشیاں منائیں اور سوشل میڈیا کے ذریعے اپنے مداحوں کو مبارکباد پیش کی۔ ستاروں نے اپنی فیملیز کے ہمراہ خوبصورت تصاویر شیئر کیں جنہیں مداحوں کی جانب سے بے حد پسند کیا جا رہا ہے۔

اداکارہ صبور علی نے اپنے شوہر علی انصاری اور ننھی بیٹی کے ساتھ یادگار لمحات کی تصاویر شیئر کیں، جس میں وہ روایتی لباس میں ملبوس نظر آئیں۔ دوسری جانب، اداکارہ حنا آفریدی نے منفرد انداز اپناتے ہوئے اپنے پشتون مداحوں کو پشتو زبان میں عید کی مبارکباد دی اور شوہر کے ہمراہ اپنی تصاویر سوشل میڈیا کی زینت بنائیں۔

نامور اداکار بلال قریشی نے اپنی والدہ کے ہمراہ ایک جذباتی تصویر شیئر کی اور عالمی امن کے لیے دعا کرتے ہوئے لکھا، “دل سے دعا ہے کہ دنیا میں امن اور سلامتی ہو، عید مبارک!”۔ اسی طرح ماورا حسین نے بھی اپنے مخصوص اسٹائل میں مداحوں کو عید کی مبارکباد دی، جس سے سوشل میڈیا پر عید کی رونقیں مزید دوبالا ہو گئیں۔