معروف اور مزاحیہ اداکار سید کمال کی برسی آج منائی جا رہی ہے

پاکستانی فلمی صنعت کے نامور اور سینئر اداکار، ہدایت کار و پروڈیوسر سید کمال کی برسی آج شائقینِِ فن کی جانب سے عقیدت و احترام سے منائی جا رہی ہے۔ منفرد اداکاری، شوخ و چنچل انداز اور بہترین ڈائیلاگ ڈیلیوری کی بنا پر دہائیوں تک سکرین پر راج کرنے والے سید کمال 27 اپریل 1934ء کو ہندوستان میں پیدا ہوئے اور انہوں نے اپنے فنی سفر کا آغاز تھیٹر سے کیا۔ پاکستان ہجرت کے بعد انہوں نے فلم ‘ٹھنڈی سڑک’ سے اپنے فلمی کیریئر کا شاندار آغاز کیا جس نے انہیں مقبولیت کی بلندیوں پر پہنچا دیا۔

ساٹھ اور ستر کی دہائی کے کامیا ب ترین ہیرو کے طور پر پہچانے جانے والے سید کمال نے 80 سے زائد فلموں میں اداکاری کے جوہر دکھائے اور متعدد فلموں کی ہدایت کاری و پروڈکشن بھی کی۔ فلمی دنیا میں کامیابی کے جھنڈے گاڑنے کے بعد انہوں نے پاکستان ٹیلی ویژن (پی ٹی وی) کے لیے معروف ڈراموں میں کام کیا اور ‘کمال کا شو’ کے نام سے ایک مقبول پروگرام کی میزبانی بھی انجام دی۔ طویل عرصے تک عارضہ قلب میں مبتلا رہنے کے بعد سید کمال یکم اکتوبر 2009ء کو 75 برس کی عمر میں اس فانی دنیا سے رخصت ہو گئے تھے، تاہم ان کی فنی خدمات کو پاکستانی سینما کی تاریخ میں ہمیشہ یاد رکھا جائے گا۔