جنسی تشدد کو جنگی ہتھیار کے طور پر استعمال کیا جا رہا ہے,عاصم افتخار

پاکستان نے اقوامِ متحدہ کی سلامتی کونسل میں تنازعات سے متعلق جنسی تشدد کی تمام اقسام کی سخت الفاظ میں مذمت کرتے ہوئے اس کے خاتمے کے لیے مزید مؤثر عالمی اقدامات اور احتساب کا مطالبہ کیا ہے۔ سلامتی کونسل کے کھلے مباحثے سے خطاب کرتے ہوئے اقوامِ متحدہ میں پاکستان کے مستقل مندوب سفیر عاصم افتخار احمد نے واضح کیا کہ جنسی تشدد جنگ کا ناگزیر نتیجہ نہیں بلکہ اسے اکثر جان بوجھ کر جنگی حکمتِ عملی، دہشت اور اجتماعی سزا کے ہتھیار کے طور پر استعمال کیا جاتا ہے، بالخصوص غیر ملکی قبضے کی صورتحال میں خواتین اور بچے اس کا سب سے زیادہ شکار ہوتے ہیں۔ انہوں نے عالمی برادری پر زور دیا کہ وہ کسی بھی مجرم کو استثنیٰ دیے بغیر سیکریٹری جنرل کے فہرست سازی کے نظام کا اطلاق سلامتی کونسل کے ایجنڈے پر موجود تمام مسلح تنازعات پر کرے اور متاثرین کو طبی، نفسیاتی اور قانونی امداد کی فراہمی یقینی بنائی جائے۔ سفیر عاصم افتخار احمد نے اس بات پر بھی زور دیا کہ انسدادِ تشدد کے لیے بین الاقوامی انسانی قوانین پر مکمل عملدرآمد اور تنازعات کی بنیادی وجوہات، بشمول غیر ملکی قبضہ اور حقِ خودارادیت سے انکار، کا مستقل حل ناگزیر ہے