سٹاک مارکیٹ میں زبردست تیزی، ایک لاکھ 68 ہزار پوائنٹس کی حد بحال

پاکستان سٹاک ایکسچینج میں کاروباری ہفتے کے دوسرے روز کاروبار کے دوران شدید تیزی اور مثبت رجحان دیکھنے میں آیا ہے۔ ٹریڈنگ کے آغاز پر ہی مارکیٹ میں 900 سے زائد پوائنٹس کا اضافہ ریکارڈ کیا گیا جس سے ہنڈرڈ انڈیکس ایک لاکھ 66 ہزار 785 پوائنٹس کی سطح پر پہنچ گیا تھا۔ دن بھر کاروباری سرگرمیوں میں تیزی برقرار رہی اور کاروباری روز کے اختتام پر ہنڈرڈ انڈیکس 2592 پوائنٹس کے نمایاں اضافے کے ساتھ ایک لاکھ 68 ہزار 460 پوائنٹس کی سطح پر بند ہوا۔ واضح رہے کہ گزشتہ کاروباری دن کے اختتام پر مارکیٹ میں مندی کے باعث انڈیکس ایک لاکھ 65 ہزار 867 پوائنٹس پر بند ہوا تھا، تاہم آج کی شاندار تیزی نے سرمایہ کاروں میں دوبارہ اعتماد بحال کر دیا ہے۔