فی الحال پاکستان خواتین کے رہنے کے لحاظ سے اچھا ملک نہیں: سیمی راحیل

پاکستان کی سینئر اور باصلاحیت اداکارہ سیمی راحیل نے ملک میں خواتین کے ساتھ پیش آنے والے بڑھتے ہوئے پرتشدد اور ناشائستہ واقعات پر گہری تشویش کا اظہار کرتے ہوئے موجودہ حالات کی شدید مذمت کی ہے۔

ایک حالیہ انٹرویو میں گفتگو کرتے ہوئے سینئر اداکارہ نے کہا کہ “فی الحال پاکستان خواتین کے رہنے کے لحاظ سے ایک محفوظ اور اچھا ملک نہیں رہا۔” انہوں نے اپنے ماضی کا ذکر کرتے ہوئے بتایا کہ ان کے دور میں حالات بالکل مختلف تھے، وہ خود ٹی شرٹ اور جینز پہن کر سردیوں کے موسم میں تین گھنٹے تک پیدل چہل قدمی کر کے واپس گھر جایا کرتی تھیں اور کوئی انہیں گھورنے کی بھی جرات نہیں کرتا تھا۔

سیمی راحیل کا کہنا تھا کہ اس زمانے میں بھی آوارہ گردی یا فقرے بازی ہوتی تھی، لیکن کسی کی یہ مجال نہیں تھی کہ وہ ہاتھ تک لگا سکے۔ انہوں نے مثال دی کہ اگر اس وقت انارکلی بازار جیسی جگہ پر بھی کوئی نازیبا حرکت کرتا تو عوام خود اس شخص کو پکڑ لیتے تھے۔ اداکارہ نے افسوس کا اظہار کیا کہ اب وہ اخلاقی اقدار، ڈر، شرم اور غیرت باقی نہیں رہی، اور آج کل خواتین کے خلاف جو کچھ ہو رہا ہے وہ انتہائی شرمناک اور ناقابلِ برداشت ہے۔