ڈیجیٹل معیشت کے فروغ کیلئے نیشنل کنیکٹیوٹی پلان کو حتمی شکل دینے کا عمل تیز

حکومت نے ملک بھر میں ڈیجیٹل معیشت کے فروغ اور انٹرنیٹ انفراسٹرکچر کو جدید بنانے کے لیے نیشنل کنیکٹیوٹی پلان پر کام تیز کر دیا ہے۔ وزیراعظم کی ہدایت پر وزارتِ آئی ٹی اس منصوبے کو حتمی شکل دے رہی ہے، جس کا بنیادی مقصد 5G ٹیکنالوجی اور فائبر براڈ بینڈ کی توسیع کے ساتھ فری لانسرز، تعلیمی اداروں اور عوام کو سستا و تیز رفتار انٹرنیٹ فراہم کرنا ہے۔ منصوبے کے تحت پاکستان کو عالمی براڈ بینڈ درجہ بندی میں 92ویں نمبر سے ترقی دے کر دنیا کے ٹاپ 50 ممالک میں شامل کرنے اور فکسڈ براڈ بینڈ کی اوسط رفتار 30 ایم بی پی ایس سے بڑھا کر 85 ایم بی پی ایس کرنے کا ہدف مقرر کیا گیا ہے۔ اس کے علاوہ آئندہ 03 سالوں کے دوران موبائل ٹاورز کی فائبرائزیشن 16 فیصد سے بڑھا کر 60 فیصد تک پہنچانے، دور دراز علاقوں کے صارفین کو ٹیکس میں ریلیف دینے اور فائبر بچھانے کی فیس ختم کر کے ون ونڈو سسٹم متعارف کرانے کی تجاویز بھی شامل ہیں۔