پاکستان کے دو خلاباز تجربات کیلئے خلا میں جائیں گے

پاکستان کے خلائی تحقیقاتی ادارے سپارکو (SUPARCO) نے انسانی خلائی مشن پروگرام میں ایک تاریخی کامیابی حاصل کر لی ہے، جس کے تحت دو خلا باز امیدوار خرم داؤد اور محمد ذیشان علی جدید تربیت کے لیے چین روانہ ہو گئے ہیں۔ یہ پیشرفت پاکستان کو ان مخصوص ممالک کی فہرست میں شامل کرتی ہے جو انسانی خلائی پروازوں کے پروگرام میں سرگرم عمل ہیں۔
پاکستان پہلی مرتبہ چائنہ سپیس اسٹیشن (CSS) کے مشن میں شرکت کرنے جا رہا ہے، جس کے 2026ء کے آخر میں شروع ہونے کی توقع ہے۔ اس مشن کے دوران ایک پاکستانی خلا باز ‘شین زو’ (Shenzhou) مشن میں بطور پے لوڈ ایکسپرٹ اپنی ذمہ داریاں انجام دے گا اور مائیکرو گریویٹی میں اہم سائنسی تجربات کرے گا۔
تحقیقاتی شعبے: مٹیریل سائنس، فلوئڈ فزکس، لائف/بائیو سائنس اور بائیو ٹیکنالوجی میں تجربات کیے جائیں گے۔
ممکنہ فوائد: ان تحقیقات کے نتائج سے ماحولیاتی تبدیلی، غذائی تحفظ (Food Security) اور صنعتی جدت میں مدد ملے گی۔
پاک چین دوستی: وزیراعظم شہباز شریف نے اس مشن کو پاک چین لازوال دوستی کا عملی مظہر قرار دیتے ہوئے سپارکو کی کوششوں کو سراہا ہے۔
وزیراعظم محمد شہباز شریف کا کہنا تھا کہ انسانی خلائی مشن کے لیے پاکستانیوں کا انتخاب دونوں ممالک کے گہرے سٹریٹجک تعلقات کا ثبوت ہے، جو پاکستان کو خلائی تحقیق کی عالمی دوڑ میں ایک نیا مقام عطا کرے گا۔