پاکستان آئی ایل او سے تعاون کو قدر کی نگاہ سے دیکھتا ہے: وزیراعظم

وزیراعظم محمد شہباز شریف سے انٹرنیشنل لیبر آرگنائزیشن (آئی ایل او) کے ڈائریکٹر جنرل گلبرٹ ایف ہونگبو نے ایک اعلیٰ سطح کے وفد کے ہمراہ ملاقات کی۔ ملاقات کے دوران وزیراعظم نے نوجوانوں کے لیے باوقار اور پیداواری روزگار کے مواقع پیدا کرنے کے حوالے سے آئی ایل او کے ساتھ شراکت داری کو سراہا اور کہا کہ پاکستان کی ہنرمند افرادی قوت کی بین الاقوامی سرٹیفکیشن اور پیشہ ورانہ تربیت کو عالمی معیار سے ہم آہنگ کرنے کے لیے آئی ایل او کی معاونت انتہائی اہمیت کی حامل ہے۔ انہوں نے مزید کہا کہ حکومت قومی افرادی قوت کی فلاح و بہبود اور صنعتی ترقی کے لیے سمیڈا (SMEDA) کو ازسرنو فعال کر چکی ہے، جس میں آئی ایل او کا تعاون مزید موثر ثابت ہو سکتا ہے۔ آئی ایل او کے ڈائریکٹر جنرل گلبرٹ ایف ہونگبو نے پاکستان کے ساتھ افرادی قوت کے تحفظ اور ترقی کے لیے مشترکہ کاوشیں جاری رکھنے کے عزم کا اظہار کیا۔