پاکستان کی آئی ٹی برآمدات نے نیا ریکارڈ قائم کر دیا

وزارت انفارمیشن ٹیکنالوجی و ٹیلی کام نے رواں مالی سال کے دوران پاکستان کی آئی ٹی صنعت کی برآمدات میں تاریخی کامیابی کا اعلان کرتے ہوئے بتایا ہے کہ ملکی آئی ٹی برآمدات 4.6 ارب ڈالر کی بلند ترین سطح پر پہنچ گئی ہیں، جو گزشتہ مالی سال کے مقابلے میں 21 فیصد زیادہ ہیں۔ وزارت کی جانب سے جاری کردہ اعداد و شمار کے مطابق، انفارمیشن ٹیکنالوجی شعبے کا تجارتی سرپلس بھی بڑھ کر 85 فیصد تک پہنچ گیا ہے، جس کے بعد آئی ٹی ملک کا تیز ترین ترقی کرنے والا برآمدی شعبہ بن چکا ہے۔ رپورٹ کے مطابق، اس کامیابی میں وزیراعظم کی خصوصی توجہ، حکومتی سرپرستی اور صنعت دوست پالیسیوں نے اہم کردار ادا کیا جس کے تحت گزشتہ سال 1 لاکھ سے زائد نوجوانوں کو جدید آئی ٹی مہارتوں کی تربیت فراہم کی گئی۔ اس کے علاوہ، دنیا بھر میں 20 سے زائد بین الاقوامی نمائشوں میں شرکت کے ذریعے 250 سے زائد پاکستانی آئی ٹی کمپنیوں اور اسٹارٹ اپس کو عالمی منڈی تک رسائی دی گئی۔ حکام کا کہنا ہے کہ حکومت نے آئی ٹی برآمد کنندگان کے لیے متعدد مراعات بھی متعارف کرائیں جن میں فائنل ٹیکس رجیم کا تسلسل اور برآمدات پر محض 0.25 فیصد ٹیکس کی سہولت شامل ہے، جس سے اس صنعت کی مسابقتی صلاحیت میں مزید اضافہ ہوا ہے۔