مہنگا ڈیزل ہونے کے باعث انٹرنیٹ فراہمی میں رکاوٹیں، 6 کروڑ صارفین متاثر

پاکستان میں ڈیزل کی قیمتوں میں ہوش ربا اضافے اور سپلائی میں رکاوٹوں کے باعث انٹرنیٹ اور مواصلاتی نظام شدید متاثر ہو رہا ہے۔ ٹیلی کام ذرائع کے مطابق، ملک بھر میں نصب 55 ہزار ٹاورز میں سے تقریباً 20 ہزار ٹاورز ڈیزل کی عدم فراہمی کے باعث کام کرنا چھوڑ چکے ہیں، جس سے 6 کروڑ صارفین کو انٹرنیٹ کے استعمال میں شدید مشکلات کا سامنا ہے۔ سینیٹ کی قائمہ کمیٹی برائے آئی ٹی نے اس سنگین صورتحال کا نوٹس لیتے ہوئے ہنگامی اجلاس طلب کر لیا ہے۔ ماہرین نے خبردار کیا ہے کہ اگر توانائی کا مسئلہ فوری حل نہ ہوا تو ملک کا پورا مواصلاتی نظام مفلوج ہو سکتا ہے، جس سے نہ صرف عام شہری بلکہ کاروباری سرگرمیاں بھی بری طرح متاثر ہوں گی۔