سندھ طاس معاہدے پر 24 کروڑ زندگیوں کا انحصار، پانی کا ہر صورت تحفظ کیا جائے گا: پاکستان

حکومتِ پاکستان کی جانب سے وفاقی دارالحکومت میں ’سندھ طاس معاہدہ: امن اور علاقائی استحکام کا ایک اہم ذریعہ‘ کے موضوع پر ایک اہم بین الاقوامی سیمینار کا انعقاد کیا گیا، جس میں ملک کی اعلیٰ سیاسی قیادت اور عالمی ماہرین نے دوٹوک مؤقف اپنایا ہے کہ سندھ طاس معاہدہ محض ایک معاہدہ نہیں بلکہ اس پر 24 کروڑ پاکستانیوں کی زندگیوں کا انحصار ہے، اور پانی کے حق پر کسی صورت سمجھوتہ نہیں کیا جائے گا۔

اس اعلیٰ سطحی سیمینار میں نائب وزیراعظم اسحاق ڈار، چیئرمین پیپلزپارٹی بلاول بھٹو زرداری، وفاقی وزیر اطلاعات عطاء اللہ تارڑ، وزیر دفاع خواجہ آصف، وفاقی وزیر موسمیاتی تبدیلی ڈاکٹر مصدق ملک، کمشنر انڈس واٹر ٹریٹی سید مہر علی شاہ، سابق وفاقی وزیر خرم دستگیر، عالمی قوانین کے ماہر احمر بلال صوفی سمیت مختلف ممالک کے مندوبین اور آبی ماہرین شریک ہوئے۔