حکومت کا سوشل میڈیا ریگولیشن مزید سخت کرنے کا فیصلہ

حکومتِ پاکستان نے ملک میں سوشل میڈیا کو ریگولیٹ کرنے کے لیے قوانین کو مزید سخت اور مؤثر بنانے کا فیصلہ کیا ہے، جس کے تحت وزارتِ داخلہ نے تمام متعلقہ اسٹیک ہولڈرز سے وسیع تر مشاورت کا آغاز کرنے کا عزم ظاہر کیا ہے۔ ذرائع کے مطابق سوشل میڈیا پر بچوں کے استحصال اور فحاشی کے بڑھتے ہوئے واقعات کا سدِباب کرنے کے لیے پاکستان میں سوشل میڈیا پلیٹ فارمز کے استعمال کے لیے کم از کم عمر کی حد مقرر کرنے کی تجاویز پر گہرائی سے غور کیا جا رہا ہے۔

ذرائع کا مزید کہنا ہے کہ ‘فیملی ویلاگنگ’ کے نام پر پھیلائی جانے والی فحاشی کو کنٹرول کرنے اور اخلاقی اقدار کے پاسداری کے لیے بھی مختلف سخت تجاویز پیش کی گئی ہیں، جبکہ بین الاقوامی مثالوں کو مدنظر رکھتے ہوئے بعض نقصان دہ سوشل میڈیا پلیٹ فارمز پر مکمل پابندی عائد کرنے کی تجویز بھی زیرِ غور آئے گی۔ اس سلسے میں وزارتِ داخلہ کے زیرِ اہتمام ایک اعلیٰ سطحی اجلاس انعقاد پذیر ہوگا جس میں پاکستان ٹیلی کمیونیکیشن اتھارٹی (PTA)، نیشنل سائبر کرائم انویسٹی گیشن ایجنسی (NCCIA)، اور تمام وفاقی و صوبائی پولیس حکام شرکت کریں گے۔

اجلاس کے دوران سائبر کرائمز، بچوں کے استحصال اور اخلاق سوز مواد سے متعلق زیرِ التوا اور درج شدہ کیسز کا تفصیلی جائزہ لیا جائے گا۔ اس کے علاوہ آسٹریلیا سمیت دنیا کے دیگر ممالک کی جدید سوشل میڈیا پالیسیوں اور قوانین کا بھی موازنہ کیا جائے گا تاکہ تمام تجاویز پر جامع مشاورت کے بعد حتمی اور قانونی فیصلوں کی منظوری دی جا سکے۔