معاشی محاذ سے اچھی خبر؛ فروری میں غیر ملکی سرمایہ کاری میں 61 فیصد اضافہ ریکارڈ

اسٹیٹ بینک آف پاکستان کی جانب سے جاری کردہ اعداد و شمار کے مطابق، فروری 2026ء میں براہِ راست بیرونی سرمایہ کاری (FDI) میں نمایاں اضافہ دیکھنے میں آیا ہے۔ فروری کے دوران پاکستان میں 21 کروڑ 40 لاکھ ڈالر کی بیرونی سرمایہ کاری آئی، جو گزشتہ سال کے اسی مہینے کے مقابلے میں 61 فیصد اور جنوری 2026ء کے مقابلے میں 23 فیصد زیادہ ہے۔

مرکزی بینک کے مطابق، جنوری 2026ء میں یہ حجم 17 کروڑ 30 لاکھ ڈالر تھا، جبکہ گزشتہ سال فروری میں 13 کروڑ 30 لاکھ ڈالر کی سرمایہ کاری موصول ہوئی تھی۔ تاہم، اگر رواں مالی سال کے پہلے 8 ماہ (جولائی تا فروری) کا جائزہ لیا جائے تو مجموعی طور پر براہِ راست بیرونی سرمایہ کاری میں سالانہ بنیادوں پر 33 فیصد کمی آئی ہے، جس کا حجم 1 ارب 19 کروڑ 50 لاکھ ڈالر رہا۔