پاکستانی مارشل آرٹس کا ہاتھوں میں انڈے پکڑ کر 340 پنچز کا ریکارڈ

پاکستان کی نامور مارشل آرٹس سٹار فاطمہ نسیم نے ایک اور شاندار کامیابی حاصل کرتے ہوئے بھارتی کھلاڑی کا عالمی ریکارڈ توڑ دیا اور گنیز ورلڈ ریکارڈز میں اپنا 10واں اعزاز درج کرا لیا ہے۔ اس سنگِ میل کے ساتھ وہ 10 گنیز ورلڈ ریکارڈز قائم کرنے والی پاکستان کی پہلی خاتون کھلاڑی بن گئی ہیں۔ فاطمہ نسیم نے ہاتھوں میں انڈے پکڑ کر ایک منٹ میں 340 پنچز مارے اور انڈوں کو ٹوٹنے بھی نہیں دیا، جسے گنیز ورلڈ ریکارڈز انتظامیہ نے باضابطہ تسلیم کر لیا ہے۔ اس سے قبل یہ ریکارڈ بھارتی کھلاڑی دیبیا جیوتی سرکار کے پاس تھا جنہوں نے 331 پنچز لگائے تھے۔

علاوہ ازیں، فاطمہ نسیم کا فلیکسیبلٹی اور اسٹریچنگ کیٹیگری میں بھی ایک اور عالمی ریکارڈ تسلیم کیا گیا ہے، جہاں انہوں نے دو کرسیوں کے درمیان ایک منٹ 45 سیکنڈ تک اسٹریچنگ بیلنس قائم رکھا۔ اس کیٹیگری میں سابقہ ریکارڈ ایک منٹ 30 سیکنڈ کا تھا۔ فاطمہ اس سے قبل برطانیہ اور امریکہ کے شوز میں نام کمانے والی لبرٹی باروس، جرمنی کی پالینا گلیبووا اور بھارت کی کرن یونیال کے ریکارڈز بھی اپنے نام کر چکی ہیں۔ واضح رہے کہ فاطمہ کا پورا خاندان عالمی ریکارڈز میں ایک منفرد مقام رکھتا ہے، ان کے والدین، دادا اور بھائی بھی گنیز ورلڈ ریکارڈ ہولڈرز ہیں اور یہ فیملی مجموعی طور پر 180 سے زائد عالمی ریکارڈز پاکستان کے نام کر چکی ہے۔